സർവ്വം മായ’

sarvam mayasarvam maya movie reviewsarvam maya malayalam reviewnivin pauly movie review

‘

ഒരിക്കൽ കണ്ടിരുന്നു എന്ന് ഓർമ്മയിൽ മാത്രം നിൽക്കുന്ന ഒരു സിനിമ

‘സർവ്വം മായ’ കണ്ടു തീർന്നപ്പോൾ മനസ്സിൽ ആദ്യം തോന്നിയത്  അത്രയ്ക്ക് സൂപ്പർ ഒന്നുമല്ല, പക്ഷേ കണ്ടിരിക്കാവുന്ന ഒരു സിനിമ എന്നതാണ്. വലിയ പ്രതീക്ഷകളോടെ തിയേറ്ററിലേക്കോ സ്ക്രീനിലേക്കോ ഇരുന്നാൽ നിരാശ വരാൻ സാധ്യതയുണ്ട്. എന്നാൽ സമയം പോകാൻ, മനസ്സ് ലഘുവാക്കാൻ ഒരിക്കൽ കാണാം എന്ന വിഭാഗത്തിൽ ഈ സിനിമ പെടും.

നിവിൻ പോളിയുടെ സാന്നിധ്യമാണ് ചിത്രത്തെ മുഴുവൻ താങ്ങി നിർത്തുന്ന പ്രധാന ഘടകം. അദ്ദേഹത്തിന്റെ നിഷ്കളങ്കമായ ചിരിയും ശരീരഭാഷയും ചില രംഗങ്ങളിൽ നമ്മളിലും സ്വാഭാവികമായി ഒരു ചിരി വരുത്തും. കഥാപാത്രം വലിയ ആഴങ്ങളോ സങ്കീർണ്ണതകളോ ആവശ്യപ്പെടുന്നില്ലെങ്കിലും, നിവിൻ തന്റെ പരിചിതമായ സൗമ്യത കൊണ്ട് അത് ഭംഗിയായി കൈകാര്യം ചെയ്യുന്നു. ചില സീനുകളിൽ അദ്ദേഹത്തെ കാണുമ്പോൾ പഴയ നിവിൻ സിനിമകളുടെ ഓർമ്മകൾ പോലും മനസ്സിലേക്കു വരും.

കഥയുടെ കാര്യത്തിലേക്ക് വന്നാൽ, പുതുമ എന്ന് പറയാൻ അധികം ഒന്നുമില്ല. പല സിനിമകളിലും നമ്മൾ കണ്ടിട്ടുള്ള കഥാ ഘടകങ്ങളുടെ കൂട്ടിച്ചേർക്കലാണ് ഇവിടെ നടക്കുന്നത്. “ഇത് എവിടെയോ കണ്ടതല്ലേ?” എന്ന തോന്നൽ പല ഘട്ടങ്ങളിലും വരും. ആന പുറത്ത് കയറി എന്ന് പറയുമ്പോൾ, മകന്റെ കുണ്ടിയിൽ തഴമ്പ് കാണാത്തത് പോലെയൊരു അവസ്ഥ 

പറയുന്നതും കാണിക്കുന്നതും തമ്മിൽ ഒരു പൊരുത്തക്കേട് ചില രംഗങ്ങളിൽ വ്യക്തമാണ്. കഥ വലിയ വാഗ്ദാനങ്ങൾ ഉന്നയിക്കുന്നതുപോലെ തോന്നിപ്പിച്ചാലും, അതിന്റെ ആഴത്തിലേക്കോ ശക്തമായ ക്ലൈമാക്സിലേക്കോ എത്തുന്നില്ല.

സംവിധാനവും തിരക്കഥയും സുരക്ഷിതമായ ഒരു വഴിയിലൂടെയാണ് പോകുന്നത്. റിസ്ക് എടുക്കാതെ, പരിചിതമായ ഫോർമുലയിൽ ഒതുങ്ങിപ്പോകുന്നു. അതുകൊണ്ടുതന്നെ സിനിമ മോശമെന്നു പറയാനാവില്ല, പക്ഷേ പ്രത്യേകിച്ച് ഓർമ്മിക്കപ്പെടുന്ന ഒന്നായി മാറുന്നുമില്ല. പശ്ചാത്തല സംഗീതവും ദൃശ്യഭംഗിയും ശരാശരിയിലൊതുങ്ങുന്നു; ഒന്നും അസഹ്യമായി തോന്നുന്നില്ല, പക്ഷേ ഒന്നും അതിശയിപ്പിക്കുന്നുമില്ല.

ആകെച്ചുരുക്കി പറഞ്ഞാൽ, ‘സർവ്വം മായ’ ഒരു ടൈം പാസ് സിനിമയാണ്. വലിയ സിനിമാനുഭവം പ്രതീക്ഷിക്കാതെ, ലഘുവായ ഒരു മൂവി ആയി കണ്ടാൽ നിരാശ കുറയും. നിവിൻ പോളിയുടെ ചിരിയും ചില ലളിതമായ നിമിഷങ്ങളും മാത്രം ഈ സിനിമയെ കണ്ടിരിക്കാവുന്ന പട്ടികയിൽ നിലനിർത്തുന്നു. കണ്ടു തീർന്ന ശേഷം ദീർഘനേരം മനസ്സിൽ നിൽക്കുന്ന ഒരു അനുഭവമല്ല ഇത്, പക്ഷേ “മോശമല്ലായിരുന്നു” എന്ന് പറയാൻ മാത്രം ഉള്ളൊരു സിനിമ.